На Благавешчанне ў вёсцы Галавенчыцы Чавускага раёна гукалі вясну
Штогод у Галавенчыцах Чавускага раёна на Благавешчанне гукаюць вясну. У гэтым годзе, 7 красавіка, на месцы правядзення абрадавай праграмы сабралося немала прысутных. Народны ансамбль народнай музыкі і песні “Землякі” РЦКіВЧ, удзельніцы аўтэнтычнага фальклорнага ансамбля “Незабудкі”, а таксама работнікі культуры сельскіх клубных устаноў, мясцовыя школьнікі і жыхары вёскі сталі ўдзельнікамі гэтага святочнага дзейства.
Пачалася праграма, як і раней праводзілі носьбіты традыцыйнай культуры вёскі Галавенчыцы, з развешваннем птушак на дрэвы, а затым па наваколлі панесліся загукальныя спевы “Благаславі, Божа, Прачыстая Маці, нам вясну гукаці, нам вясну гукаці…” у выкананні “Незабудак” і “Землякоў”. А далей – карагоды-гульні з усімі ўдзельнікамі “Па беражку” і “А мы просу сеялі”. Адметным у свяце стала падкідванне печаных птушак на абрусе з загукальнымі словамі, і, як бы пачуўшы гэтыя загукі, выйшла цёплае сонейка з-за хмарак. Для дзяцей былі праведзены традыцыйныя гульні в.Галавенчыцы: “Дзежка”, “Кумкі-галубкі”, “Калеча-малеча”.
Свята скончылася, але ж доўга над Галавенчыцамі несліся спевы у ваыкананні “Незабудак” і “Землякоў”. Ва ўсіх удзельніках дзейства застаўся добрый настрой і задавальненне.
]
Алеся Далецкая, загадчык аддзела традыцыйнага мастацтва і рамёстваў РЦКіВЧ ДУК “Цэнтралізаваная клубная сістэма Чавускага раёна”
Фотаматэрыялы карэспандэнтаў раённай газеты “Іскра”
